اعرف نوع بشرتك

سألت نفسك قبل كدا ايه هو نوع بشرتك؟ لو اه يبقى انت ماشي في الطريق الصحيح. لما تعرف نوع بشرتك هتعرف تحدد نوع الروتين والمنتجات المناسبة ليك، و بالتالي هتحصل على بشرة أكثر صحة و شبابًا.

البشرة ليها ٤ انواع:

۱- البشرة العادية

خصائصها:

بشرتك ناعمة و مشرقة بس مش جافة أو دهنية؟ مبروك! نوع بشرتك هو افضل نوع بشرة. البشرة العادية بتفرز الكميات المناسبة من الزيوت الطبيعية عشان تفضل صحية و مترطبة طول اليوم، و عشان تحافظ علي ده لازم تهتم بيها بالطريقة المناسبة.

ازاي اهتم بيها:

احرص على تنظيف بشرتك بلطف باستخدام غسولك المفضل مرة أو مرتين في اليوم، استعمل كريمات مرطبة بشكل يومي و خصوصًا في فصل الشتاء و ده لأن البشرة العادية قد تميل للجفاف مع التقدم في العمر، و أخيرًا متنساش تشرب مياه باستمرار.

۲- البشرة الجافة

خصائصها:

بشرتك مشدودة و ناشفة؟ بتعاني من قلة ترطيب و مرونة بشرتك؟ يبقى نوع بشرتك هو الجاف. البشرة الجافة عادةً بتكون باهتة و شكلها شاحب نظرًا لقلة الترطيب و قلة افراز الزيوت الطبيعية و هي من أكثر أنواع البشرة عرضة للتجاعيد المبكرة والخطوط الرفيعة.

ازاي اهتم بيها:

اغسل وجهك بغسول لطيف علي البشرة و بمياه فاترة، اشرب من ۸ الي ١٢ كوب مياه يوميًا على الأقل عشان تحافظ على مستوى ترطيب جسمك، رطب بشرتك صباحًا و مساءً و احبس الترطيب داخل بشرتك باستخدام زيوت الوجه الخفيفة.

نصيحة نوت بوتانيكالز ليك انك تدور دائمًا علي المنتجات اللي فيها مكونات بتشد الترطيب زي الجلسرين و الهيالورونيك أسيد وابعد عن المنتجات اللي فيها كحول وعطور صناعية وسلفات.

۳- البشرة الدهنية

خصائصها:

البشرة الدهنية تتميز بزيادة الإفرازات الدهنية و اللمعان، بالإضافة لأنها أكثر أنواع البشرة عرضة لظهور الرؤوس السوداء. لكن بالرغم من كل المشاكل اللي بتواجه اصحاب البشرة الدهنية الإ أنها من أكثر أنواع البشرة حظاً.

ازاي اهتم بيها:

ابدأ روتينك بتنضيف بشرتك بعمق باستخدام غسول الوجه المناسب ليك عشان تتخلص من الدهون الزائدة وتحصل على بشرة متوازنة و لامعة، اشرب من ۸ الى ١٢ كوب مياه يوميًا و احرص علي تقشير بشرتك مرتين في الأسبوع للتخلص من أي أوساخ أو دهون متراكمة داخل المسام و لتقليل ظهور الرؤوس البيضاء والسوداء. و بالرغم من المتعارف عليه بأن البشرة الدهنية مش محتاجة ترطيب خارجي، الإ أن ده شيء خاطيء تمامًا. البشرة الدهنية زي باقي أنواع البشرة محتاجة ترطيب يومي بكريم خفيف و مناسب للبشرة الدهنية.


٤-البشرة المختلطة

خصائصها:

البشرة المختلطة في الغالب يتم التعامل معاها على أنها مزيج من البشرة الجافة/ العادية مع البشرة الدهنية، حيث أن أصحاب البشرة المختلطة بيتميزوا بزيادة إفراز الدهون في منطقة الجبهة و الأنف و الذقن أو ما يسمى بمنطقة ال T-zone، في حين أن باقي الوجه غالباً ما يكون عادي أو جاف.

ازاي اهتم بيها:

عامل كل منطقة في بشرتك بالطريقة المناسبة ليها. استخدمي منتجات البشرة الدهنية علي الT-zone زي المرطبات الخفيفة والمنتجات اللي بتساعد على التحكم في إفراز الزيوت و احرص على تنظيف مسام بشرتك بعمق على الأقل مرة في الأسبوع، بالإضافة لتقشير وجهك من مرة لمرتين أسبوعياً، و استخدم للمنطقة الجافة/العادية المرطبات المناسبة ليها و متنساش تشرب كمية كافية من المياه عشان تحافظ على نضارة و مرونة بشرتك.

إيه هي البشرة الحساسة والبشرة المعرضة للحبوب؟ هم مبيعتبروش أنواع بشرة زي الانواع اللي قبلهم؟

لحسن حظنا لأ! الحساسية والحبوب هي مشاكل ممكن تصيب أي نوع من أنواع البشرة الأربعة. فكرة إن الحبوب بتطلع للبشرة الدهنية بس دي خرافة و مش بس البشرة الجافة هي اللي ممكن تكون حساسة، المشاكل دي ممكن تظهر لأي نوع من أنواع البشرة.

لو عندك مشكلة من الاتنين يبقى لازم تاخد بالك من المنتجات اللي بتستخدميها و تحرص على قراءة مكونات أي منتج قبل ما استخدامه علي بشرتك وتعرف المكونات اللي يستحسن تبعد تماماً عنها عشان تحافظ علي بشرتك وتحميها من أي ألتهاب أو حساسية.


كل نوع بشرة له مميزاته و عيوبه اللي لازم نتقبلها ونعتني بيها لأنها جزء مننا، و لإن الجمال الحقيقي و صحة بشرتنا و جسمنا بتبدأ من جوا؛ فلازم نحرص على الالتزام بنظام حياة صحي و ناخد بالنا من اللي بناكله و نشربه و نلعب رياضة ونشرب مياه باستمرار، و أخيرا أياً كان نوع بشرتك متنساش تستخدم واقي الشمس بشكل يومي و في كل فصول السنة.

لو عندك اي اسئلة بخصوص نوع بشرتك، اكتبها في مربع التعليقات تحت المقالة.

مشاهدة واحدة (١)٠ تعليق