الحبوب، الرؤوس السوداء، الرؤوس البيضاء. أسباب ظهورها وكيفية منعها.

أكيد في مرحلةً ما في حياتك طلعلك حبوب و حسيت قد ايه هي مزعجة جداً. عايز تعرف إزاي بتظهر وإزاي تمنع حدوثها؟ اقرأ البلوج للأخر عشان تعرف ايه انواع الحبوب المختلفة، ليه بتظهر، ازاي تعالجها، وإزاي تمنع حدوثها من الأساس.


حب الشباب هو مشكلة بتحصل في كل أنواع البشرة -غالبا ما بتكون الدهنية- بتأثر علي بصيلة الشعر والغدد الدهنية. الغدد الدهنية بتفرز زيوت البشرة الطبيعية اللي بتكون طبقة حماية علي الجلد. حب الشباب بيحصل لكل الأعمار والأجناس وأنواع البشرة المختلفة.



أنواع حب الشباب وأعراضه:

كنت تعرف إن الرؤوس السوداء والبيضاء هي أنواع من الحبوب؟

كلمة حبوب البشرة هي كلمة واحدة بتضم تحتها حاجات كتير زي: الرؤوس السوداء والبيضاء وحب الشباب والحبوب الدهنية وغيرها.

الحبوب بتحصل لما بيتجمع تراكمات من خلايا الجلد الميت مع زيوت بشرة متراكمة و يكونوا (Comedo) تسد المسامات.


ممكن نقسم ال(comedos) ل:

  • الرؤوس السوداء: هي تجمع من خلايا الجلد الميت مع زيوت بشرة متراكمة جوا المسام و معرضة للهواء عشان كدا بتتأكسد و بيبقي لونها أسود. الرؤوس السوداء غالباً بتظهر علي الأنف والخدود ومش بتسبب أي التهابات.

  • الرؤوس البيضاء: زي الرؤوس السوداء بالضبط هي تجمع من خلايا الجلد الميت مع زيوت بشرة متراكمة جوا المسام ولكنها مش معرضة للهواء عشان كدا بتفضل محتفظة بلونها الابيض.

  • البثور: حبوب بارزة ملتهبة بتظهر تحت الجلد من غير صديد نتيجة وجود بكتيريا.

  • بثور يها صديد: تطور للبثور بتبدأ فيه البكتيريا تكون صديد تحت الجلد بيسبب ألم و احمرار.

  • خرّاج تحت الجلد: حبوب مؤلمة جدا بها صديد وبننصح وقتها دايماً بزيارة الطبيب.

إيه بيسبب الحبوب؟

الحبوب بتظهر نتيجة لأسباب كتير منها:

إضطرابات الهرمونات: الهرمونات في جسمنا مستواها مبيفضلش ثابت و بيوصل أعلي مرحلة له وقت المراهقة والدورة الشهرية والحمل. و ده يفسر ليه أغلبنا طلعله حبوب في الأوقات دي!

الأكل والحساسية: منتجات الألبان والأكلات السريعة و السناكس والجلوتين مش بس بيأثروا علي القولون والمعدة ولكن كمان بيأثروا علي ظهور الحبوب بشكل ملحوظ لأن بشرتنا بتتأثر باللي بناكله خصوصاً لو كان عندك حساسية منه و انت مش عارف.

منتجات التجميل والماكياج: مش كل الماكياج بيسبب حبوب طبعاً ولكن في كتير منه بيحتوي علي مكونات بتسد المسام وطبعا مش هتكلم عن الناس اللي بتنام بالماكياج...

البكتيريا: وجهنا بيتعرض طول الوقت للبكتيريا -كل ثانية حرفياً- عن طريق لمسنا لوجهنا باستمرار او من الموبايل. البكتيريا بتدخل جوا المسامات و تكون الحبوب -و في بعض الأحيان- صديد.

الاحتكاك: احتكاك الجلد المستمر بسطح خشن بيتلف الجلد ويكسر طبقة الحماية اللي عليه وده بيعرضه للبكتيريا بشكل أكبر.

الأدوية: بعض الأدوية اللي بتأثر علي الهرمونات زي الكورتيزون وأدوية الغدة الدرقية ممكن تساهم في ظهور الحبوب.

و في أسباب تانية زي تنظيف الوجه أقل أو أكتر من الطبيعي.


العلاج

كتير من المستحضرات في الصيدليات بيوفروا حل فعال جداً لحالات الحبوب الخفيفة للمتوسطة زي الكريمات والسيرم الموضعي اللي بيكون فيه ريتينويد او حمض الساليسيليك او بنزويل بيروكسايد و زنك.

اغسل وجهك بغسول لطيف خالي من الصابون ورطبه بكريمات مفيهاش مواد بتسد المسامات. عادل مستوي حموضة بشرتك باستخدام التونر المناسب و قشر وجهك اسبوعيا عشان تتخلص من الجلد الميت.

نوت بوتانيكالز دايما بتنصحك تزور الطبيب لما تلاقي حالة الحبوب بتسوء او لقيت خرّاج عشان تتجنب ظهور بقع او علامات.


إزاي أمنع ظهورها:

عشان توقف ظهور الحبوب، انت محتاج تبعد تماماً عن كل مسبباتها:

  • خد بالك من اللي بتاكله و حاول تبعد عن الوجبات السريعة و الأكلات اللي بتسببلك حساسية.

  • اختار بعناية المنتجات والمكونات اللي بتحوطها علي وجهك وابعد عم المنتجات اللي بتسد المسام واللي بتسبب جفاف البشرة و اغسل وجهك جيداً بعد الماكياج.

  • اغسل فرش الماكياج كويس كل اسبوع أو اسبوعين لأنها سطح مثالي لنمو البكتيريا.

  • حاول متلمسش وجهك كتير و عقم موبايلك و يديك باستمرار.

  • اغسل وجهك مرتين يومياً بغسول وجه لطيف خالي من الصابون والكحول.

  • قشر وجهك مرة اسبوعياً عشان تتخلص من الجلد الميت.

  • رطب وجهك بكريمات فيها مكونات مبتسدش المسامات زي الجليسرين وحمض الهيالورونيك.

٠ مشاهدة٠ تعليق