العناية بالبشرة بين الخرافات و الحقائق (يتبع)

رجعنا تاني بخرافات تانية عشان نبين حقائقها. مستعدين؟

مينفعش تستخدم زيوت علي وجهك لو بشرتك دهنية

الخرافة: لو حطيت زيوت وجه علي وشك هتخليه يفرز زيوت اكتر و هيخلي شكله دهني أكتر. كمان ممكن تسد المسام و تطلعلك حبوب.

الحقيقة: بعض الزيوت تعتبر مثالية للبشرة الدهنية ده لأنها بتنظم افراز زيوت البشرة و بتنضف المسام من تراكمات الدهون زي زيت الجوجبا و زيت بذور اليقطين و زيت ثمرة الورد. ابعد عن الزيوت اللي ممكن تتسبب في انسداد مسام البشرة زي زبدة الكاكاو علي سبيل المثال.


الزيوت العطرية امنة للاستخدام علي البشرة أكترمن العطور الصناعية في منتجات البشرة

الخرافة: الزيوت العطرية امنة اكترمن العطور الصناعية و ده لأنها طبيعية و كل المنتجات الطبيعية امنة أكتر من أي شئ كيميائي.

الحقيقة: مش صحيح ابدا ان كل حاجة طبيعية أمنة اكتر من الكيميائي و ده لأن كل حاجة حوالينا كيميائية حتي الهواء! و الاثبات ان الزيوت العطرية هي زيوت مركزة جداً مستخرجة من الزهور و الأعشاب المختلفة مليانة بمسببات الحساسية اللي ممكن تسبب حساسية او حتي اكزيما لو مستخدمتش بحرص و حكمة.

كمان العطور الصناعية لازم تستخدم بكمية معقولة علي بشرة الوجه و ينصح بالابتعاد عنها و عن الزيوت العطرية تماماً لو كانت بشرتك حساسة.


قناع الوجه المتقشر جيد لبشرتك

الخرافة: قناعات و أشرطة الوجه المقشرة جيدة لازالة الرؤوس السوداء و الرؤوس البيضاء و التراكمات من داخل المسام. كل ما تمسك في الوجه أكتر و يكون نزعها صعب و مؤلم أكتر هتكون نتيجتها افضل بكتير.

الحقيقة: أقنعة الوجه اللي بيكون نزعها من علي البشرة صعب بتؤذي الحاجز الطبيعي للبشرة نتيجة الشد و محاولات النزع. علي الرغم من انك ممكن تشوف جواها حبيبات سوداء او بيضاء علي حسب لون القناع فهي مصنوعة بالغرض ده عشان تدي ايحاء بازالة الرؤوس السوداء و البيضاء حتي لو معملتش ده!

استخدم مكونات مفيدة للبشرة بتنضف المسام زي النياسيناميد او منتجات لطيفة علي البشرة زي غسول الوجه للتخلص من الشوائب المتراكمة داخل البشرة.


السيليكون مضر للبشرة

الخرافة: السيليكون مكون مضر للبشرة ممكن يسد المسامات و يكون حبوب ده غير انه بيعمل حاجز علي البشرة مش بيعدي المياه او الهواء او الترطيب فبيخنق البشرة.

الحقيقة: السيليكون هو مكون مفيد و يستخدم تقريبا في معظم منتجات التجميل! السيليكون له أنواع كتير جدا بخصائص مختلفة و لكن كلهم مش بيسدوا المسامات و مش بيسببوا تكون الحبوب. حتي الأنواع اللي بتسيب حاجز علي البشرة بيكون بيعدي الترطيب و الهواء من و الي البشرة!

الحقيقة كمان ان بعض انواع السيليكون بتقلل مظهر المسامات و بتملي التجاعيد و الخطوط الرفيعة.


انهي خرافة مكنتش تعرف حقيقتها؟ شاركنا في التعليقات الخرافات اللي عايز نكشفها.


مشاهدة واحدة (١)٠ تعليق