العناية بالبشرة بين الخرافات و الحقائق

العناية بالبشرة من أكتر المواضيع اللي ظهر حواليها خرافات كتير بسبب ان ناس كتير بتجرب و تنقل تجربتها لناس تانية حتي لو كانت غلط و مش مبنية علي اي اساس علمي. تعالوا نصحح بعض الخرافات المنتشرة!


زبدة الشيا بتسد المسام

الخرافة: زبدة الشيا ثقيلة جداً علي البشرة و ممكن تسد المسام و تساعد علي ظهور الحبوب

الحقيقة: زبدة الشيا هي مرطب ممتاز للبشرة الجافة و الحساسة و فاقدة الترطيب بمعدل قليل جدا لسد المسامات (٠ -٢) و من الصعب جدا انها تتسبب في ظهور حبوب! كمان هو مكون مهم لمرطبات الصيف بعد التعرض لأشعة الشمس.

زبدة الشيا مرطب ممتاز للبشرة لكن زبدة الكاكاو لأ! زبدة الكاكاو ممتازة للاستخدام في مرطبات الشفاه او حتي الجسم ولكن مش لبشرة الوجه و ده لانها بتسد المسام بمعدل عالي بيوصل ل ٤ لو استخدمت بكميات كبيرة. ممكن تعرفوا اكتر عن الزيوت اللي مش بتسد المسام من المقالة دي.


الليمون بيساعد في تفتيح البشرة

الخرافة: عصير الليمون بيساعد علي تفتيح البشرة بشكل طبيعي.

الحقيقة: الليمون مينفعش ابدا يتحط مباشرة علي البشرة بأي شكل من الأشكال! أحماض الليمون قاسية جداً علي البشرة و ممكن تسبب جفافها و احمرارها و في بعض الأحيان حساسية شديدة!

منتجات التفتيح الغنية بحمض الكوجيك و الألفا اربوتين هتكون اختيار ناجح لتفتيح البشرة بشكل امن.


المياه الساخنة والباردة/الثلج بيساعدوا علي فتح و غلق المسامات

الخرافة: اغسل وجهك بمياه ساخنة عشان تفتح المسامات و تقلل الرؤوس السوداء. استخدم المياه الساقعة او الثلج عشان تقفل مساماتك ووجهك يبقي شكله احسن.

الحقيقة: المسامات هي نهايات علي السطح الجلد بتساعد في اخراج العرق و الزيوت من داخل الجلد الي الخارج. العضلات فقط هي اللي تقدر ترتخي او تنقبض و المسامات مش عضلات!

المياه الساخنة ممكن تتسبب في جفاف البشرة و تحرمها من فوائد الزيوت الطبيعية اللي بتفرزها و المياه الباردة و الثلج ممكن يأذوا و يتسببوا في تلف الحاجز.الطبيعي للبشرة و احمرار الجلد و احياناً الحساسية.

لو حسيت ان مساماتك شكلها أوسع من الطبيعي ده معناها انها محتقنة من تراكمات الاوساخ و الزيوت داخلها و محتاج تنضفها بمواد زي النياسيناميد او غسول وجه مناسب. أفضل درجة حرارة للمياه تستخدمها هي المياه الفاترة او الدافئة.


البشرة الدهنية مش بتحتاج ترطيب

الخرافة: البشرة الدهنية مش بتستحمل المرطبات و ممكن يخلوا شكلها دهني اكتر و تفرز زيوت اكتر.

الحقيقة: البشرة الدهنية زيها زي أي نوع من انواع البشرة بتحتاج ترطيب مستمر و ممكن يصيبها الجفاف! استخدم مرطبات

غنية بالجلسرين و الهيالورونيك اسيد اللي بيشدوا الترطيب جوا البشرة من غير ما يتسببوا في جعلها دهنية.


شاركونا في التعليقات الخرافات اللي سمعتوها عن البشرة عشان نصححها في المقالات الجاية.



٧ مشاهدات٠ تعليق