الفرق بين الترطيب و حبس الترطيب

الماء عصب الحياة! بس هل ده ينطبق علي جسمنا و صحتنا؟

أكتر من ٦٠% من وزن جسمنا الكلي بيتكون من الماء، و أكتر من ٥٠% من وزن أعضائنا كمان بيكون مياه!

الجلد هو أكبر عضو في جسم الانسان و هو خط دفاعه الأول ضد الميكروبات الخارجية و بيحتوي من أكتر من ٦٥% من وزنه الكلي من المياه. عشان كدا المياه بتلعب دور كبير في الحفاظ علي صحة الانسان بشكل عام و صحة بشرته بشكل خاص.


الترطيب و حبس الترطيب

بعد معرفة أهمية المياه و دورها الكبير في الحفاظ علي بشرة شابة و صحية، تفتكر ايه هي طرق ترطيب البشرة و ازاي تحافظ علي الترطيب؟ الأجابة في ترطيب البشرة "Hydration" و حبس الترطيب داخل البشرة "Moisturization".

علي الرغم من ان الأتنين بيندرجوا تحت قسم المرطبات في العربي ولكن كل واحد فيهم له دور مختلف تماما و لكن أدوارهم بتكمل بعض و بتعزز تأثير بعض.

ببساطة، ترطيب البشرة هو مد البشرة بالمياه و الترطيب اللازم لأداء وظائفها في حين حبس الترطيب هو منع تسرب و هروب المياه و الترطيب من البشرة و بكدا تفضل مترطبة لفترة أطول وتكون صحية أكتر.

شرتنا مليانا مسام ليها فوائد كتير و لكن كمان ممكن تساعد في تبخر المياه بشكل أسرع. ده غير ان البشرة التالفة بتخسر ترطيبها بمعدل أسرع من البشرة الصحية و هنا ييجي دور المرطبات اللي بتساعد علي حبس الترطيب عن طريق تقليل فقد المياه و تبخرها. عدم ترطيب البشرة و حبس الترطيب داخلها بيتسب في تلف البشرة و جعلها باهتة و مترهلة.

بس ازاي ارطب بشرتي و أحافظ علي ترطيبها؟


منتجات مرطبة

الماء

ببلاش و متوفر و ممكن تستخدمه في أي مكان و طول الوقت! أشرب من ٦ الي ٨ أكواب من الماء يومياً عشان تحافظ علي بشرتك و جلدك مترطبين وصحيين طول الوقت.

المرطبات

استخدم منتجات تحتوي علي الجلسرين و الهيالورونيك اسيد و اليوريا -علي سبيل المثال وليس الحصر- عشان يشدوا الترطيب داخل البشرة و يحافظوا علي نضارتها.

المنتجات المرطبة انواعها كتير زي السيروم و التونر و الكريمات و اللوشن و الايسنس.


المكونات الحابسة للترطيب

المكونات دي تنقسم لنوعين:

  • مكونات تساعد علي بناء و علاج البشرة زي النياسيناميد و السيراميد لأن البشرة الصحية مش بتفقد ترطيبها بسهولة.

  • مكونات بتكون طبقة عازلة علي البشرة بتقلل معدل هروب الماء من البشرة زي السيليكون و السكوالين.

معظم المنتجات اللي بتحبس الترطيب داخل البشرة تحتوي علي مكونات مرطبة و بتقوم بالدورين. المنتجات دي بتكون علي شكل كريمات أو لوشن.

بعد ما عرفت الفرق، لازم تحافظ علي صحة بشرتك عن طريق ترطيبها.

٣ مشاهدات٠ تعليق