حبوب كمامة الوجه: كيفية التخلص منها و منع ظهورها

لو انت مواظب على ارتداء الكمامة من بداية جائحة كورونا، ففي الغالب أن بشرتك اتعرضت لكتير من الالتهابات و الحبوب في منطقة الكمامة.

كمامة الوجه بتحبس أنفاسك جواها و ده بيؤدي إلى زيادة درجة الحرارة داخل الكمامة، مع وجود الرطوبة اللي بتحصل بسبب العرق و الدهون اللي البشرة بتفرزها طول اليوم، بالإضافة إلى الاحتكاك الناتج من ملامسة الكمامة لبشرتك، كل الظروف دي لما بتتجمع مع بعض بتخلق بيئة مثالية لنمو وانتشار البكتيريا و الميكروبات على بشرتك؛ و بالتالي ظهور الحبوب والالتهابات.


إزاي أمنع ظهورها؟

لو بتحاول تمنع ظهور الحبوب و حدوث الالتهابات من البداية، نوت بوتانيكالز بتنصحك تتبع الخطوات دي عشان تحافظ علي بشرتك قدر الامكان اثناء ارتدائك للكمامة:

  • الاحتكاك يعتبر من أهم الأسباب اللي بتؤدي لتهيج البشرة، حاول تلبس الكمامة أو تربطها بحيث تحميك بدون ما تحتك ببشرتك و احرص على استخدام غسول وجه لطيف على البشرة و خالي من الصابون بعد خلع الكمامة لإزالة العرق والدهون من وجهك.

  • استعمل مرطب خفيف على الوجه و غني بالزنك كحاجز إضافي على بشرتك يحميها من الاحتكاك، و ده لأن الزنك له دور كبير في مكافحة الحبوب وتقليل الالتهابات.

تقدر تحصل علي الزنك و تستفيد من مميزاته من خلال استخدام منتجات عناية بالبشرة تحتوي على نسبة معتدلة الزنك أو عن طريق بعض الزيوت الطبيعية زي زيت بذور اليقطين و زيت بذور التوت.

  • ابعد عن منتجات الوجه المضاف إليها عطور الفترة دي ، خصوصاً لو كنت من أصحاب البشرة الحساسة، و ده لأن العطور -سواء الطبيعية والصناعية- ممكن تهيج بشرتك، خاصة في درجات الحرارة المرتفعة.

  • في الظروف العادية عدم تنظيف البشرة بعمق بعد استخدام الميكاب يعتبر من أكبر مسببات الحبوب، و ده بيرجع لاحتواء الميكاب على كتير من الزيوت اللي بتسد مسامات البشرة، فما بالك بتأثيره على بشرتك في درجات الحرارة المرتفعة و على سطح رطب أتحت الكمامة!

  • البشرة بتمتص منتجات العناية بالبشرة بشكل أسرع و أسهل بكتير لما بتتعرض لدرجات حرارة مرتفعة، و للسبب ده احنا بنعرض بشرتنا للبخار قبل استخدام ماسكات البشرة. نفس الشيء بيحصل تحت الكمامة، فخليك حذر من بعض المكونات التي ممكن تسبب لبشرتك حساسية و التهابات في درجات الحرارة المرتفعة زي حمض الساليسيليك و الريتينويد.

  • لو كنت من مستخدمين الكمامات الطبية ذات الاستعمال الواحد فاحرص على تغييرها باستمرار مرة كل 4 ساعات، و في حالة ملامسة الكمامة للماء أو تعرضها للبلل لأي سبب نوت بوتانيكالز بتنصحك بتغييرها فورًا و استبدلها بكمامة نظيفة، أما لو كنت تستخدم الكمامات القطنية؛ فتجنب استخدام الكمامة يومين متتاليين واحرص على غسلها وتعقيمها بعد كل استخدام.

طريقة التخلص منه:

  • اغسل وجهك بغسول لطيف علي البشرة و خالي من الصابون، أو امسحه بماء ميسيلار بعد خلع الكمامة مباشرة للتخلص من البكتيريا و الأوساخ المتراكمة على وجهك.

  • استخدم كريم ترطيب غني بالسيراميد والزنك لإصلاح بشرتك والتخلص من الحبوب، بالإضافة لاستخدام مستحضرات العناية بالبشرة اللي بتحتوي على البنزويل بيروكسايد. لو لاحظت انتشار الحبوب بطريقة سريعة أو حالتها ساءت عن المعتاد، ننصحك دائما بزيارة الطبيب.

مع ان الحبوب و الالتهابات المصاحبة لارتداء الكمامة ممكن تكون مزعجة لكتير مننا بس ارتداء كمامة الوجه مهم و واجب.

خليك في البيت قدر الامكان و حافظ علي نفسك و مجتمعك من إنتشار الوباء.


٠ مشاهدة٠ تعليق