حقيقة المنتجات الخالية من الكيماويات

في الفترة الأخيرة اعلانات كتيرة أنتشرت عن منتجات خالية من الكيماويات سواء للبشرة أو للشعر في كل مكان حرفياً و لكن هل في حاجة فعلا اسمها منتجات خالية من الكيماويات؟ هل ممكن اصلاً يكون في حاجة خالية من الكيماويات فعلياً؟ الأجابة باختصار هي لأ. مستحيل تواجد اي شئ علي وجه الأرض يكون خالي من الكيماويات. ولكن ليه؟


ما هي الكيماويات؟

الكيماويات هي منتجات تم تواجدها عن طريق تفاعل كيميائي.

كل شئ في الطبيعة و منهم الماء و الهواء و حتي أحنا كبني أدم بنتكون من جزيئات و ذرات و بيحصل جوانا تفاعلات كيميائية زي الهرمونات علي سبيل المثال! علمياً يستحيل تواجد شئ غير كيميائي. طيب ليه في شركات بتسوق لمنتجاتها بأنها خالية من الكيماويات؟

باختصار لأن ناس كتير بقي عندها يقين ان كلمة كيماويات مرتبطة بمواد مسممة و خطيرة علي صحة الانسان و اضرارها أكثر من منافعها. و ده أكيد خطأ. أكيد في كيماويات و مواد يستحسن تجنبها و لكنها بتمثل نسبة ضئيلة جداً جنب المواد الفعالة المفيدة و المتطورة.


هل المنتجات الطبيعية مساوية لكلمة خالية من الكيماويات؟

المنتجات الطبيعية بقت مشهورة و مرغوبة في الفترة الأخيرة و ده لأن الناس بتفتكر ان اي منتج طبيعي خالي من الكيماويات او زي ما بيوصفوها "متحطش عليها أي اضافات صناعية" أو "غير مصنعة في المعمل" بس هل ده صحيح؟ لأ بردو! كتير من المنتجات بتحتوي علي مكونات من الطبيعة تم تعديلها معملياً عشان تقوم بوظائف تانية مختلفة تماماً عن وظيفة مادتها الطبيعية الأصلية و لكنها تندرج تحت مواد طبيعية.

اعرف أكتر عن المنتجات الطبيعية من المقالة دي.


مكونات أساسية لابد من تواجدها

حتي لو كنت بتكره الكيماويات و أي مركب مصنع معملياً و مش عايز تستخدم غير المنتجات الطبيعية - وده شئ مقبول و لطيف- احرص ان كل منتجاتك تحتوي علي مواد حافظة طالما في مكوناتها مياه او مستخلصات مائية زي جل الصبار علي سبيل المثال.

المواد الحافظة هي مكونات يتم اضافتها علي المنتجات لمنع تكاثر الميكروبات داخلها خلال فترة تخزينها و استخدامها.

تواجد الميكروبات زي البكتيريا و العفن و الفطريات في المنتجات اللي بتستخدمها علي شعرك او بشرتك أو -الأسوء- عينيك ممكن يسبب انتشار العدوي في المنطقة دي و يوقع الشعر و يسبب تكون حبوب و صديد!

كل المنتجات المحتوية علي المياه لازم يتم معالجتها بمواد حافظة! ابعد تماماً عن أي منتج لا يحتوي علي مواد حافظة.

المنتجات اللامائية زي زيوت الوجه مش بتحتاج مواد حافظة لأنها لا تحتوي علي ماء و هو المصدر الرئيسي لنمو و تكاثر البكتيريا.


المكونات أهم!

اختار منتجاتك بعناية عن طريق معرفة مكوناتها و هل هي مناسبة لبشرتك و هتناسب روتينك ولا لأ. متشتريش منتج عناية شخصية مش محطوط عليه المكونات كلها!

المكونات هي اللي بتحدد هل المنتج ده ملائم ليك و هيعمل شغله ولا لأ مش الكلام التسويقي اللي الشركة بتقوله عن منتجها. خد وقتك انك تقرأ المكونات بعناية و تتأكد ان فيها مواد حافظة و اعرف ان مفيش حاجة اسمها منتج خالي من الكيماويات.

٠ مشاهدة٠ تعليق

أحدث منشورات

عرض الكل