علامات التمدد: أسبابها و كيفية علاجها

علامات التمدد هو خطوط حمراء أو بيضاء بتظهر في أماكن متعددة في الجسم، خاصة الصدر والبطن والذراعين والفخذ والمؤخرة.

المفاجأة هي ان علامات التمدد بتظهر عند الرجال كمان، مش مقتصرة بس علي الستات زي ما البعض بيقول!

هي فقط أكتر شيوعاً عند السيدات بسبب الحمل و ده -من وجهة نظري- شئ جميل جداً عشان يفكرنا دايما بقيمة تعب السيدات و قد أيه اجسامنا قادرة علي خروج انسان جديد و حياة جديدة من جواها.


أنواع علامات التمدد و أسباب ظهورها

علامات التمدد بتحصل غالباً لما الجلد يحصله تغيرات كبيرة او متتالية في حجمه زي:

  • أثناء المراهقة و سن البلوغ لأن الجسم بيتعرض لتغيرات كتيرة بينتج عنها تمدد الجلد و ظهور علامات التمدد.

  • أثناء الحمل، الجلد علي منطقة البطن بيتمدد عشان يواكب تطورات نمو الجنين. و بعد الولادة الجلد بيرتخي و يحاول يرجع لطبيعته مرة التانية و ده غالباً ما ينتج عنه علامات التمدد.

  • زيادة و خسارة وزن كبير أوزيادة و خسارة الوزن المتكررة كمان بينتج عنها علامات تمدد الجلد.

  • بعض الأمراض المتعلقة بالغدة الكظرية.

  • الأستخدام المتكرر للكورتيكوستيرويد

أزاي اتخلص منها؟

للأسف مفيش علاج لعلامات التمدد بعد ما تظهر يخليها تختفي، و لكن ممكن تخليهم أقل وضوح.

لو عايز تعالجهم بنفسك في اليبت فممكن تستخدم كريمات الجسم بالهيالورونيك أسيد أوالريتينول علي علامات التمدد بأستمرار.

أو الأحسن انك تستعين بطبيب الجلدية أنه يخلي مظهرهم أقل عن طريق الموجات الصوتية أو العلاج بالليزر أو التقشير الكيميائي و غيرها من الطرق اللي لازم تتم عن طريق طبيب مختص.


مع أن بعض الناس بيؤكدوا ان زبدة الشيا و زبدة الكاكاو و زيت اللوز ساعدهم في أخفاء علامات التمدد، الي أن مفيش أي بحث علمي يثبت انهم بيفيدوا في الحالة دي أو ممكن يعملوا أي تأثير.

من السهل أنك تخلي العلامات أقل وضوح لما تكون جديدة و لسه متكونة عن ما تكون علامات قديمة.

مع أن علامات التمدد بتكون مزعجة لناس كتير و لكنها بتمثل جزء كبير منك اتغلبت فيه علي مرض أو كبرت أو خسرت أو زدت وزن أو جبت حياة تانية للدنيا فخليك فخور بالعلامات اللي بتوثق اللحظات دي. افتكر دايما تحب نفسك و تحس بالراحة و الثقة في نفسك و شكلك.


٩ مشاهدات٠ تعليق