منتجات العناية بالبشرة الأساسية لأي روتين

سواء كنت من الناس المهووسة بمنتجات العناية بالبشرة أو لسه مبتدئ و مش عارف تبدأ منين، في أساسيات في أي روتين عناية بالبشرة لازم تكون موجودة.

في منتجات عناية بالبشرة -بسيطة لكن مهمة-لازم تستخدمها يومياً بغض النظر عن إيه هو نوع بشرتك:

واقي الشمس

من أهم المنتجات اللي دايما بننساها و نتجاهل اهميتها مع أنه بيحمي بشرتنا من تلف أكبر عدو للبشرة. الشمس!

الشمس بتشع انواع كتير من الأشعة أغلبها بتسبب تلف البشرة و التجاعيد و البقع الداكنة و الخطوط الرفيعة و ظهور علامات السن قبل وقتها الطبيعي! إحرص دايما تختار نوع واقي الشمس المناسب لبشرتك و بعامل حماية من الشمس أكتر من 30

إزاي استخدمه؟

كميه قد الجنيه الفضة هتكون مناسبة جدا تغطية وجهك و رقبتك و احرص دايما انك تحطه كل ساعتين طول فترة تعرضك للشمس.

نصيحة: استخدم مرطي الوجه و السيرم الخاص بيك قبل استخدام واقي الشمس لو مادة أكسيد الزنك لأنها بتمنع امتصاص أي منتج بتحط بعدها.

غسول الوجه

المياه عمرها ما كانت كفاية لوحدها لتنظيف البشرة و كمان الصابون مش أفضل حل! و ده لأنه قاسي جدا بسبب طبيعته القلوية اللي بتنشف البشرة و تسبب تلفها بسبب اختلافه عن طبيعة البشرة الحمضية. اختار دايما غسول الوجه اللطيف الخالي من الصابون و السلفات بأنواعه و الكحول اللي بيسببوا جفاف البشرة.

اغسل وجهك بغسول الوجه المناسب لنوع بشرتك مرتين يومياً أول ما تصحي وقبل ما تنام.

الكريم المرطب

كل أنواع البشرة بتحتاج ترطيب حتي البشرة الدهنية! ترطيب بشرتك هي من أهم الخطوات الأساسية اللي لازم تون موجودة في روتينك اليومي و ده لأن خلايا البشرة بتتكون من 75% من المياه و ده اللي بيكسبها النضارة و الحيوية. البشرة الغير مرطبة بتكون عرضة أكتر لتكون الحبوب و ظهور التجاعيد و الخطوط الرفيعة و بيكون شكلها باهت و غير صحي!

استخدم المرطب المناسب لبشرتك مرتين يوميا و ابعد عن المنتجات اللي فيها زيوت معدنية و بارافين لأنها بتسد المسام و مبتغسلش من علي الوجه بسهولة.

مقشرات الوجه

كتير بيفتكروا المقشر خطوة مش أساسية في روتين العناية بالبشرة مع أنها مهمة جداً عشان نشيل الجلد الميت.

الجلد بطبيعته بيتجدد كل 28 يوم و المقشرات بتساعد في التخلص من الجلد الميت عشان الجلد الجديد يظهر و يتنفس. ابعد تماماً عن المقشرات الفيزيائية اللي بتسبب في تلف البشرة. استخدم المقشرات الكيميائية و الانزيمية مرة في الأسبوع أو حسب التعليمات علي العبوة.

كريم العين

الجلد المحيط بالعين بيكون أرق و أضعف بكتير من بشرة الوجه عشان كدا لازن يتعامل بلطف و نستخدم له منتجات مرطبة لطيفة عشان نحميه من التجاعيد و الجفاف

إبعد عن المرطبات المعطرة و استخدام الزيوت مباشرة علي المنطقة دي. متستخدمش مرطبات الوجه علي منطقة تحت العين لأن أحياناً بتكون ثقيل علي المنطقة دي أو فيها مكونات غير مناسبة للعين.

استخدم كربمات العين مرة أو مرتين في اليوم و قبل استخدام الكونسيلر عشان يحمي الجلد و يرطبه.

و دي خطوات زيادة تضيفها علي روتينك الأساسي:

التونر

التونر بيستخدم بعد غسول الوجه قبل استخدام الكريم المرطب عشان يساعدوا علي توازن حموضة البشرة و زيادة ترطيبها.

ابعد عن التونر اللي اول مكوناته كحول لأنه بيسبب جفاف البشرة. التونر ممكن يكون سبراي أو سائل.

السيرم

لسيرم له أنواع كتير منها سيرم التفتيح و سيرم الترطيب و السيرم المعالج و غيرها. اختار السيرم حسب نوع و حالة بشرتك و المشكلة اللي بتواجها. استخدم السيرم قبل النوم.

ماسك الوجه

في أنواع كتير من ماسكات الوجه منها:

قناع الوجه:

أقنعة وجه تحتوي علي فورميلا مرطبة مكثفة عشان تدخل الترطيب جوا البشرة بعمق بشكل أسرع. قناع الوجه هو خطوة غير أساسية في الروتين.

أقنعة الطمي:

الطمي هو مادة بتتغلغل جوا المسام تجذب الزيوت المتراكمة و الشوائب فبتنقي المسام بعمق.

الطمي أنواع كتير فدور انهي نوع مناسب لبشرتك قبل ما تستخدمه. ممكن تستخدم قناع الطمي مرة قي الأسبوع.

متنساس ان البشرة الصحية كمان بتعتمد علي اللي بناكله و نشربه لأنه جزء من الروتين بتاعنا فاحرص انك تشرب مياه و تاكل وجبات متوازنة


مشاهدتان (٢)٠ تعليق