هل السيليكون مضر للبشرة؟

لو كنت متابع السوشيال ميديا الفترة اللي فاتت، أكيد عدي من قدامك النقاش الطويل أذا كان السيليكون مضر ولا لأ لبشرتنا وشعرنا و ناس كتير بالفعل بدأت تقاطع السيليكون! بس هل هو مضر فعلاً زي ما ناس بتقول ولا دي خرافات؟ تعالوا نعرف تأثير السيليكون علي بشرتنا.


ما هو السيليكون؟

السيليكون هو عنصر خامل متكون من جزيئات سيليكا و اكسجين. مع ان جزيئاته اللي مصنوع منها كلها موجودة في الطبيعة الا انه عنصر مصنوع معملياً و غير موجود في الطبيعة و لكن ده مش معناه انه مؤذي! كلمة سيليكون هي كلمة عامة تشمل تحتها كتير جدا من انواع السيليكون المختلفة من اللي بتستخدم و مش بتستخدم في صناعات التجميل و كل نوع فيهم له خصائصه المختلفة عن باقي الأنواع.


خصائص السيليكون

عازل

السيليكون يكون طبقة عازلة شفافة غير مرئية علي البشرة تعمل علي حبس الترطيب داخل البشرة و تقليل معدل تبخر الترطيب من طبقات البشرة. الطبقة دي كمان بتكون ناعمة جدا و بتدي البشرة مظهر صحي عشان كدا الميكاب بيحتوي علي سيليكون بنسب أعلي بكتير من مستحضرات العناية بالبشرة.


يسمح بتنفس البشرة

مش معني انه عازل يبقي بيخنق البشرة! جزيئات السيليكون تركيبها الجزيئي بيسمحلها بتنفس البشرة و ده لأن جزيئاتها بينها و بين بعض مسافات واسعة كفاية لتعذية البشرة و تنفسها.


لا يسد المسام

علي الرغم من الخرافات حوالين السيليكون انه بيسبب انسداد مسامات البشرة و بيساهم في تكوين الحبوب الي ان ده مش مثبت علمياً. علي العكس، السيليكون فرصة انه يسد المسام هي صفر! وبالعكس كمان هو بيدي تأثير وقتي ان شكل المسامات أصغر عن الحقيقي و بيملي التجاعيد و الخطوط الرفيعة .


هل المفروض أتجنب السيليكون؟

لو مكنتش بتستخدم غسول للبشرة يبقي ايوه! و في الحالة دي بننصحك تستخدم غسول لأن أضرار عدم استخدامه أسوء بكتير من أضرار استخدام منتجات فيها سيليكون.

الملخص، السيليكون هو مادة خاملة، مستقرة، لا تسبب انسداد المسام ولا تكوين الحبوب و تسمح بمرور الماء و الهواء من و الي البشرة. ده غير انها بترتبط بالماء بسهولة و بتقلل تبخير الترطيب من البشرة. سيبنالك الحكم هل مفروض تستخدمه ولا لأ.


مشاهدتان (٢)٠ تعليق