٥ أخطاء شائعة في روتين العناية بالبشرة

في عصر وسائل التواصل الاجتماعي اللي بنعيشه في الوقت الحالي ، بنقرأ و نتفرج كل يوم علي نصائح وتعليمات للعناية بالبشرة. بعضهم بيكون صح ، والبعض الآخر ممكن يضر بشرتك!

تعالوا نشوف أكتر أخطاء شائعة في روتين العناية بالبشرة:


١.عدم استخدام واقي الشمس

واقي الشمس هو واحد من أهم منتجات العناية البشرة اللي لازم تستخدم يومياً. ضرر التعرض لأشعة الشمس المباشرة مش بس بيتمثل في حروق البشرة أو الإسمرار ولكن كمان ممكن يسبب التجاعيد و التصبغات و جفاف البشرة و ظهور علامات السن علي البشرة بشكل أسرع!

اتأكد انك بتستخدم واقي شمس واسع المدي عشان يحمي وشك من اشعة الشمس UVA و UVB. احرص انك تعيد استخدامه كل ساعتين أو ثلاث ساعات.


٢. غسل الوجه بماء ساخن أو بارد جداً.

المياه الساخنة ممكن تتسبب في جفاف البشرة و تحرمها من فوائد الزيوت الطبيعية اللي بتفرزها و المياه الباردة و الثلج ممكن يأذوا البشرة و يتسببوا في تلف الحاجز.الطبيعي للبشرة و احمرار الجلد و احياناً الحساسية. عشان كدا أطباء الجلدية بينصحوا بغسل الوجه بماء فاتر يكون لطيف علي البشرة.


٣.التركيز الزائد و الهوس

الهوس ممكن يضر بشرتك. سواء كان الهوس بمكون معين أو بفعل معين في روتينك. على سبيل المثال ، غسل وجهك أكثر من مرتين يوميًا ممكن يتسبب في إتلاف حاجز بشرتك وجفافها مهما كان نوع بشرتك. عشان كدا بننصحك تلتزم بروتين صحي متوازن بحيث تستخدم المكونات التي تناسب نوع بشرتك وحالتها بدون التركيز علي شئ معين و تجاهل مكون تاني مهم.


٤. استخدام المقشرات الفيزيائية

مع ان المقشرات بتساعد في التخلص من الجلد الميت عشان الجلد الجديد يظهر و يتجدد. المقشرات الفزيائية ممكن تأذي البشرة و تتسبب في تلفها. استخدم بدلاً لها المقشرات الكيميائية و الانزيمية مرة في الأسبوع أو حسب التعليمات علي العبوة.


٥. النوم بالمكياج

المكياج نفسه مش ضار للبشرة، ولكن النوم به هو واحد من أسوأ الأخطاء اللي ممكن ترتكبها. تخيل أن تنام و علي بشرتك طبقات من المكياج ممكن تحتوي على زيوت و مكونات تسد المسام. اتأكد من إزالة مكياجك وتنظيف بشرتك بشكل صحيح قبل النوم.

شاركنا في التعليقات ايه الأخطاء اللي اكتشفت انك بتعملها في روتينك اليومي.

١٦ مشاهدة٠ تعليق