٥ نصائح لبشرة مشرقة خلال رمضان

رمضان كريم! الشهر الكريم رجع تاني بطقوسه الفريدة المليانة فرحة و سعادة و أكل حلو! مين مش بيستني رمضان عشان يستمتع بلمة العيلة كل يوم علي الفطار و السحور و يفضل سهران طول الليل يتفرج علي المسلسلات و هو بياكل القطايف و الكنافة بعد ما فطر البط و البشاميل، او المحشي علي حسب. أصلها مدارس و عادات كل بيت ممتدة من الجدود!

بس اوعي تنسي تهتم ببشرتك وسط كل ده! أحنا هنا عشان نساعدك في الحصول علي بشرة صحية خلال رمضان من خلال ٥ نصائح سهلة وسريعة!


اشرب مياه بكمية كافية

بعد صيام مدة طويلة تصل الي ١٥ ساعة يومياً، لازم نشرب كمية المياه اللي الجسم بيحتاجها و هي اتنين لتر في اليوم. وزع شرب المياه علي مدار اليوم بين المغرب و الفجر و متشربش كتير وقت الفطار و السحور. احنا مش بنحوش المياه في جسمنا زي الجمل! كل اللي هيحصل ان بطنك هتوجعك باقي اليوم.

متنساش تشرب كويس لأن شرب كميات غير كافية من المياه بيعرّض الجلد للجفاف و ظهور علامات السن قبل أوانها.


كُل صح

كلنا بنستني رمضان طول السنة عشان ناكل الاكل الدسم علي الفطار و نحلي بالكنافة و القطايف الغرقانين في الشربات بس خلي بالك ان كترهم مش كويس! مش بس لمرضي السكر أو زيادة الوزن و لكن كمان للجلد. السكر الكتير بيكسر ألياف الكولاجين والايلاستين و بيخلي الجلد شكله مش صحي ده غير انه بيسرّع ظهور علامات التقدم في السن.


نام كويس

كلنا بنسهر نستني السحور و لكن متخليش ده يأثر عليك بالسلب! قلة النوم ممكن تتسبب في التأثير علي عملياتك الحيوية و تقلل تركيزك. ده غير انها هتخلي بشرتك تظهر بشكل باهت و غير صحي و تساعد في ظهور الهالات السوداء.

احرص انك تنام كويس من ٧-٨ ساعات يومياً عشان تقوم ببشرة صحية و تكون قادر تمارس حياتك الطبيعية بمعدل تركيز طبيعي خلال فترة الصيام.


الشمس مش بتغيب في رمضان

الشمس مش هتروح في حتة في رمضان! احرص علي استخدام واقي شمس واسع المدي لحماية بشرتك من الاشعة فوق البنفسجية خصوصاً مع قلة الترطيب اللي بتصيب البشرة خلال الشهر الكريم.

الترطيب ثم الترطيب ثم الترطيب

وقت الصيام جسمنا بيحتاج يترطب من مصادر خارجية اكتر من أي وقت بسبب قلة المياه. اهتم أكتر بترطيب بشرتك خصوصاً بشرة الوجه و الشفايف و تحت العين. استعمل كريمات الوجه و زبدة الشفاه و كريمات العين المرطبة مرتين يوميا أو حسب طريقة الأستخدام المذكورة علي المنتج.

مواد زي الهيالورونيك اسيد و الجليسرين و السوربيتول هيكونوا اختيار ممتاز لشد الترطيب من البيئة المحيطة لداخل البشرة و تقليل تبخّر الرطوبة من داخل البشرة لخارجها.

شاركونا روتينكم في رمضان في التعليقات!


مشاهدة واحدة (١)٠ تعليق